October 21, 2020

Desportu Timor-Leste

AS Marca Firme Kompete 90 Minutu hasoru Lalenok United


Dili – Ekipa segundu divizaun AS Marca, prontu hasoru ekipa Adversáriu primeira divizaun Lalenok United iha stadium Gleno-Kafé Ermera, Kinta (15/10) fulan Outubru semana ne’e nia laran.

Tuir treinadór AS Marca Romão Guterres iha nia entrevista hateten, daudaun ne’e sira nia preparasaun másimu tebes atu hasoru ekipa adversáriu iha jogu ba oitavu finais nian iha stadium Gleno.

“Fallansu hirak ne’ebé hetan iha jogu apuramentu sira liu ba, iha parte liña avansadu ninian mak sei iha problema, maibé durante loron hirak ne’e, ami hahú hadi’a, nune’e jogu hasoru ekipa Lalenok bele hatudu rejultadu ho di’ak liu tan”. Treinadór ne’e dehan lia hirak ne’e iha nia entrevista, hafoin remata treinamentu ba nia jogadór sira iha kampu Futebol Delta 4, Suco Comoro, Tersa (13/10/2020).

Tanba ne’e, treinadór AS Marca ne’e mós afirma liu Tan, sira nia preparasaun kuaze oitenta porsentu, no prontu los atu hasoru Lalenok United.

“Hau garante katak manan ka lakon minutu ’90’, mak termina ami nia distinu”. Dehan nia.

Nia mós garante nia ekipa sei hatama golu ba ekipa adversáriu, liu husi fallansu ruma husi ekipa adversáriu halo sala iha kampu laran.

Enkuantu kapitaun AS Marca nian, Francisco Miguel Maia Gama, ne’ebé uza kamizola númeru 96, mós reforsa tan, sira prontu atu hasoru ekipa boot Lalenok United iha stadium Munísipal Kafe Ermera.

“Hanesan kapitaun optimista katak, lakon ka manan, nafatin simu tanba ne’e jogu”.

Kapitaun ne’e mós deklara, sira prontu atu hasoru ekipa adversáriu iha jogu ba oitavu finais ninian. (Vidal).

Facebook Comments

error:
P