Dili – Sekretáriu jerál Federasaun Futeból Timor-Leste (FFTL) Nelio Isác Sarmento informa, daudaun ne’e nafatin halo hela preparasaun ba jogadór selesaun nasional sira, tanba Timor Leste sei partisipa iha jogu Pra Kualifikasaun Zuziki Cup, bainhira hasoru Brunei iha tinan ne’e nia laran.
Nia relata, preparasaun hahú kedas iha tinan kotuk relasiona ho jogu sira ne’ebé kria ona hanesan kopa foin liu ba no tinan ne’e atu kria tan, ne’e hanesan faze ida preparasaun ba jogadores sira hodi responde ba kompetisaun bot sira ne’e.
“Jogu Pra Kualifikasaun Zuziki Cup ne’e, Timor-Leste sei hasoru Brunei iha loron 28 fulan Agustu to’o 4 Setembru tinan ne’e”. Sekretáriu jerál ne’e informa iha nia knaár fatin FFTL, Kuarta (13/01/2021).
Nia mós husu ba jogadór selesaun nasional sira atu nafatin hatudu sira nia atitude ho di’ak, nune’e bele hatudu rejultadu di’ak iha futuru.
“Jogadór sira ne’e nafatin treinu, balu mai husi sub-16, ba sira ne’ebé nia prestasaun ne’ebé di’ak ne’e promove sira sa’e ba selesaun nasional no daudaun ne’e jogadór selesaun nasional, mais ou menus tolu nulu resin”. Relata nia.
Nune’e mós bainhira mak hare jogu liga ne’e la’o fila fali, ita husik sira atu fila ba ida-idak nia klubu, hafoin mak treinadór selesaun nasional sira halo observasaun.
Depois jogu liga remata bolu fila fali mai iha selesaun nasional, halo treinamentu, nune’e labele halakon sira nia resisténsia jogu.
Preparasaun dahuluk ne’e mak Zuziki Cup, prepara mós Sub-16 ASEAN ninian U19 no Sub-15 ba feto ninian. (Vidal).
